1. Ang posibleng tagal ng paggamit ng isang videoke machine ay maaaring i-base sa lokasyon nito. Kapag nasa bandang looban, mas maikli. Pero kapag binuhat na at pinuwesto sa bandang kalsada, kasama ng tolda, patay na. Walang tulugan. Buwis-lalamunan ang lapag niyan.

2. Laging merong maghahanap ng song na tipong kalalabas lang sa MTV, makabagong version o rendition ng isang partikular na kanta at OST ng isang pelikulang napanood niya 10 years ago, kahit obvious naman na wala sa song book.

Siya: Wala ba nung __________ (insert song title)?
Ikaw: Nasa libro ba?
Siya: Wala eh.
Ikaw: Dumbass.

3. Hindi rin mawawala yung madaling kapusin ng enthusiasm at energy. Tipong pagkatapos ng unang chorus, ipapasa na sa iba yung microphone, sabay ngiti na may kasamang hirit na “okay na ‘ko, ikaw na lang ‘pre”.

4. Kabaliktaran naman ito ng katabi niyang habang kumakanta ng no-look sa screen ay pumupuntirya na ng bagong song na babanatan sa song book. Kasabay pa nito ang pagkabisado ng song number. Multi-tasking at its best.

5. Nandiyan din si Mareng Tessie the Tester. Labing walong beses nang napapadpad sa kanya yung microphone, pero walang palya pa rin sa pagpepe-perform ng imortal na hello, mic test, 1 2 3, hello, **pukpok**, hello. Walang tiwala?

6. Present din lagi ang instant audio engineer. Yung laging humihirit ng “pakidagdagan mo nga yung bass, konti pang treble, masyadong malakas ang echo, pakitaasan yung key, ilayo mo yung machine, masyadong malapit, nagii-static”. Sarap sabihan ng “kunin mo yung chord ng mic, tapos pulupot mo sa leeg mo”

7. Hindi ako magaling kumanta. At hindi mo din kailangan maging magaling sa pagkanta para gumamit ng videoke machine. Isa ito sa mga simbolo ng demokrasya. Pero syempre, dumadapo ang nililikha mong tunog, musika or something sa tenga ng iba. Kaya dapat gawing disente. Wag mo nang lagyan ng kulot ang boses o sapilitang vibrato kung wala ka naman nun. Baka mabuhusan ng arinola. Simple. Pasok.

8. Ang scoring system sa isang videoke machine ay kasing accurate ng prediksyon ng ulan base sa dami ng ipis, langgam at ano pang insekto sa paligid. Huwag seryosohin. Nakakamatay.

9. Sa mga okasyon o party, may transition ang mga gumagamit ng videoke machine. Kapag medyo maaga pa, mga teenagers, binata at dalaga ang naka-pwesto. So ang mga kanta, modern. Pagdating ng gabi, mga bumubirit na. Kaya malamang Aegis at Regine Velasquez ang nakasalang. Pagpa-madaling araw, sila uncle na at ang kanilang favorite Engelbert Humperdinck.

10. The Closer. Ang public enemy number one pagdating sa paggamit ng videoke. Siya yung natirang gising at kahit halatang pagod na ang boses ay ayaw pa ring tigilan ang hirit sa microphone. Minsan, parang binabasa na nga lang niya yung mga lyrics na may kasamang mga pabati, announcement at dighay. Siya dapat ang pinagpa-practice-an ng mga MMA fighters.